Vawiina thuchhuah an siamah, K. Sapdanga (Mobile -  9436140430) chuan a bial Aizawl North-III huamchhûnga By-Election neihna tur veng pakhat Edenthar ZPM WhatsApp group-ah, BSUP-ah Pu Thangtea leh Chuaungova an kal fo an ti a, campaign tawp niah Chiang fek fawkin, 'In vote thlakna kan hre vek dawn, karleh lawkah tutenge luah zui zel tlak kan lo thlir nawn ang' tih vel mai mai a tawk viau. 'Opposition party enkawl nge in duh ruling Party enkawl?' te zu ti mai mai ila, tiin thu a thawn (post) an ti a. "Hei hi BSUP, Edenthar venga chengte laka chungtlâkna leh in palzutna a ni a. Home Minister K. Sapdanga hian Model Code of Conduct a kalh mai pawh a ni lo, midang rikrapna leh vauna (Intimidation) a tel avangin Representation of Peoples Act,1951 dan kalh tlat a ni", MNYF leh MPYCC chuan an ti. 

Kalphung thar sawrkâra a meizang hlaptu leh thil ṭha duh vànga danglamna thlen tuma kalphung thar lehkhabu 'Change' tih hial lo ti chhuaktu Home Minister meuhin mi rethei leh harsa zawkte tâna thu hriat nuam lo leh dengkhawng tak a ti chhuak duh hi MNYF Hqrs leh MPYCC chuan kan ngai thutakin pawi kan ti takzet a. Kalphung Thar hlauhawm zia leh kalphung hlui ai pawha tha lo sawrkar Mizoramin kan hrawn mek hi a vanduai thlak kan ti takzet a ni, an ti bawk.

MPYCC leh MNYF chuan, Congress sawrkar laia sak BSUP Edenthar, Rangvamual, Lawipu, Durtlangah te hian chenna in leh lo nei lo mi harsa zawkte tân, duhsak bik nei lovin a remchan dàn ang zela luahtir an ni ṭhin a. MNF sawrkar hun chhung pawhin chu chu thil kal dàn phung a ni. Inthlan dawn hnaiha hetianga midang ti thlabâr leh rikrap zawnga Home Minister-in a nihna hmang sual a, midang a vau bet ta mai hian a bial chhung leh AMC bial 6-na mipuite a ngaihnepzia a lantîr a, hun kal tawhah hetianga invauna leh thu thinṭhawng hi hriat tur a awm ngai lo. Lungmuang tak leh thin thia BSUP luahtute an awm laia anmahni ti thlabâr thei thu hriat tur a awm ta mai hi a ngaihthiamawm loh takzet a ni, an ti.

Home Minister K.Sapdanga hi Zoram mipui, a bial chhung North-III leh BSUP, Edenthara chengte beng hriatah By-Election awm hma ngeia ngaihdam dil turin kan phut a. Inthlannaa vote duh luat avànga thuneihna hmanga invauna rawngkai leh thil intihluihtîr tumna ang chi hi thleng tawh lo se MNYF leh MPYCC chuan kan duh a ni, tiin an tarlang.

Vawiin vek khan MNYF leh MPYCC te chuan Social Media a AMC Ward VI Corporator, John Zosangliana Ralte (L)  dawta puhtu Gilbert Ralte lakah FIR leh Criminal Complain, Cyber Crime ah an thehlut  nghal bawk.